SPORTS MINISTER PU ROBERT ROMAWIA ROYTE-IN FLIGHT SIMULATOR HAWNG; JEREMY LEH REMSIAMI TE LAWMPUI NAN Rs 35 lakh A HLAN BAWK.
Ni 30th May 2019 chawhma dar 10:00 khan Khatla NCC Office-ah Sports Minister Pu Robert Romawia Royte-an Flight Simulator a hawng.
Mizoram sorkar hnuaia Sports & Youth Service Department hmalaknain kan thalai thlawhtheihna khalh zirna lama hmanraw tangkai leh pawimawh tak Flight Simulator chu thalai he lama tuite tana hman theih turin hawn a lo ni ta a. A thu mai ni lova, Cockpit leh Computer hmanga a taka thlawhtheihna khalh zirna khawl pawimawh tak hi tangkai taka hmang turin Minister chuan NCC leh thalai kal khawmte a chah a ni.
Mizoram sorkar leh NCC tangkawpte chuan Tuirialah NCC Academy leh Aviation Hub (Thlawhna khalh zirna) changtlung tak din tumin Defence Ministry-ah project siamin Director General of NCC, New Delhi sawipuiin Sports Minister chuan hma a lo la tawh a, hei hi a theih anga chaka bawhzui mek a ni. Sports Minister chuan NCC hmangin kan thalaite ruih hlo, zuk leh hmuam leh sualna hrang hrang lak atangin kan chhanhim thei tih hriain tun aia National Cadet Corps (NCC) chu chak zawka kalpui tul a tih thu a sawi bawk. NCC hotute leh thawktute chu an mamawh leh harsatna hreh lova a hnena thlen thin tur leh a theih ang anga puih a huam thu a hrilh bawk.
Maj. Gen. Bipin Baksi,VSM, Addl. DG, NCC, (NER) pawhin thu sawiin, Mizoram sorkarin, thalaite hmakhaw ngaia hmanraw thar leh changkang tak, Fligh Simulator an nei thar chu a lawmpui thu a sawi a. NCC hmalakna tuipuia thahnemngai taka thawktu Mizoram sorkarin Sports Minister a nei chu lawmawm a tih thu leh, NCC hmalaknain hma a sawn zel a beisei thu a sawi bawk. Mizo mipuite pawhin NCC mi leh sate chu en hrang mai lova, anmahni anga ena thawhhopui turin a sawm bawk.
Wg Commander S.Nitin chuan NCC (NER) leh Mizoram sorkarin NCC hmalaknaa thawhhona tha tak an neih avanga a lawmthu leh Sports Minister Pu Robert Romawia Royte kaihhruaina hnuaia NCC-in hmalam a pan chu lawmawm a tih thu a sawi bawk.
Sport Minister hi Brig. SK Dey, NCC, Wg Cmmander S.Nitin, Er. H.Lalzirliana, MLA, Pu T.C.Pachhunga, Ex-MLA, Pu H.Lalengmawia IAS, Secretary, SYS, Pu Zothanmawia MCS, Director, SYS leh official thahnem takin an tawiawm a ni.
Vawiin vek chawhnu dar 2:00 khan Chanmari YMA Hall-ah Sports & Youth Services Department-in Jeremy Lalrinnunga, Gold Medalist, 3rd Youth Olympic Games hnenah Rs. 15,00,000/- leh Lalremsiami, 3rd Youth Olympic Games Silver Medalist leh 18th Asian Games-a Silver Medal lak lawmpuina Rs. 20,00,000/- hlanna inkhawmah Sports Minister Pu Robert Romawia Royte chuan Khuallian niin hun a hmanpui.
He inkhawma Khuallian Pu Robert Romawia Royte chuan thusawiin, Mizo infiammi pahnih Jeremy Lalrinnunga leh Lalremsiami te hlawhtlinna a lawmpui thu sawi nawnin, Mizoram leh India ram khawvel hriata infiamna lama min pholangtu kan infiammite pahnih a ngaihsan thu a sawi a. Sorkar thara Sports Minister a nih veleha a ngaih pawimawh, heng mi pahnihte puala Incentive Cash Award chin fel a tum chu March ni 13, 2019 khan Sports Department-a hotute nen tihfel a ni a, kan Chief Minister zahawm tak Pu Zoramthanga, Finance Minister ni bawkin phur tak leh rang taka sum min tihfelsak hi a lawmawm tak zet a. Inthlan boruak avanga Model Code of Conduct-in min phuar avangin tum anga hmain pe thei lo mah ila, tuna Cash Award pek an ni ta chu lawmawm a ti a. Tun hnuah chuan infiamna kawnga hlawhtlingte hnenah rang zawka Award pek ni se a duh thu a sawi bawk.
Sports Minister Pu Robert Romawia Royte chuan infiamna hi mihring hriselna atan te, rilru hrisel neihna atan te, zuk leh hmuam, ruih hlo laka min vawnghimtu pawimawh tak a nih thu sawiin, India rama State fit ber ni tura hmalak mek a nih thu a sawi lang bawk.
Mizoramin infiamna lama hma kan sawn zel theih nan Sports Policy nei turin chak taka hma lak mek a ni a. Tun atanga hun reilo teah chuan mumal leh felfai zawkin Sports Policy hnuaiah Sports & Youth Services Department chuan hma a la thei dawn a ni a ti.
Mizo thalaite chu tun aia uar zawka infiamna lama ke pen turin a sawm a. State level, National level leh International level-a hming chher thei tura tan la zel turin Mizo thalai infiam mite a chah a, chapona dah bova mahni inrintawkna nena infiamna meichher chhi eng zual zel turin thalai infiammite a chah a ni.
Pu H.Lalengmawia IAS, Secy, SYS pawhin lawmpuina thusawiin, Mizo thalai infiammite chu mahni inrintawkna, tumruhna, a eng zawng leh beidawng lova thil thlir chunga infiamnaah rilru pu turin Mizo thalaite a fuih nghal bawk a ni.
He inkhawmah hian Mizoram sorkar hnuaia Tourism Department Brand Ambassador turin kum khat atan Jeremy Lalrinnunga contract sign-pui a ni a, contract amount Rs. 3,00,000/- pawh Tourism Minister Pu Robert Romawia Royte-in a hlan ani.
