Nimin chawhma dar 11 khan Mizoram Bharat Scouts & Guides, Kolasib District - Commissioners Meet chu Block Resource Centre (BRC), Samagra Shiksha Kolasibah neih a ni. Pi Zoliani Hnamte, District Chief Commissioner, Bharat Scouts & Guides leh District Education Officer ni bawk chuan he hun hi a kaihruai a, Kolasib DC Dr. H. Lalthangliana, District President, Bharat Scouts & Guides chu khuallian a ni.
He hunah hian Kolasib District chhunga Bharat Scouts & Guides Commissioner-te bakah State Headquarters hruaitute an tel thei bawk a ni.
Dr. H. Lalthlangliana chuan Commissioner kalkhawmte hmanah thusawina hun a nei a. “Mizo zia hi Scouts and Guides ze dik tak a ni” tiin Bible chang lar tak 'Nang malsawmna ni ang che'(Genesis 12:2 behchhan) tih chu Scouts and Guides thupui nen pawh a in hmeh hle thu a sawi. Scouts and Guides thiltum tam takte chu kan Kristianna leh tlawmngaihna nunpuitu hnam kan nihna anga kan hlenchhuah fo ṭhin thu a sawi bawk.
DC chuan "Midangte tana nung tur chuan mahni tana nun a pawimawh hmasa ber a, thil dik leh ṭha tir turin mahni zahawmna vawna a pawimawh a, midangte ṭanpui turin mahni ke a din dan kan zir a pawimawh a, kan hriselna leh nundan kan vawn ṭhat a pawimawh hle a ni” a ti.
Mizoram Bharat Scouts & Guides State Headquarters aṭangin Pu Lalngilneia Colney, State Secretary & Youth Welfare Officer Sports and Youth Service (SYS) in thusawina hun a hmang a. Scouts and Guide hmalakna ṭhenkhatte tarlanna hun a hmang bawk. Pu Lalngilneia chuan “Scouts & Guides chu Voluntary Organisation niin behchhan leh kalphung felfai taka kal a nih avangin National mai bakah International Level thleng pawh a hriat a ni a, mumal taka thil ṭha tihna kawnga hma latu pawl lian tak a ni” a ti.
Vawiin a Kolasib District Bharat Scouts & Guides – Commissioners Meet ah hian Dr. H. Lalthlangliana chuan Commissioner ruat chhuahte hnenah Warrant of Appointment hlanna a nei a ni.
Chawhnu lamah Pi Lalnunsiami Pachuau, State Organiser kaihhruaina in hun hman niin, Pi Laltanpuii Principal School of Nursing Thingdawl Kolasib chu Investiture lak tirin Asst.District Commissioner(G) atana lak luh a ni a.
Training neih chhunzawm anih hnu ah zawhna leh chhanna hun hman a ni bawk.
