29th August, 2024 : India ram Hockey khel thiam lar tak Major Dhyan Chand-a piancham den chhenin India ram pumpuiah National Sports day vawiin 29th August 2024(Thu) hi hman a ni a, Mizoramah a lawmna pui ber chu Sports Authority of India (SAI) State Training Centre, Mission Vengthlang-ah hun hman a ni. National Sports Day-ah hian thupui atan “Sports for the promotion of Peaceful and inclusive societies “ tih a ni.
Hawnna inkhawmah hian Pu Lalramsanga Sailo, Secretary, Sports & Youth Services chu khuallian niin, Sports chu mihringte indaidan na thiattu, remna leh inpumkhatna atan hmanrua pawimawh a ni a ti a. Hriselna leh infiamna hi thil kalkawp tlat niin, mimal invawn nan, ruihhlo do nan leh rilru lam harsatna te hneh nan a tangkai thu a sawi a. Vision Olympic 2036 kalpui chhoh mek tan Sports lama thawktu zawng zawngte tangrual turin a sawm a ni.
Programme hi Pu C.Lalremsanga Joint Director, Sports & Youth Services chuan a kaihruai a. A ruala thuthiam lak (Pledge taking) hun Pu Lianminthang, Regional Director Sports Authority of India (SAI) kaihruaiin hman a ni a. Taksa alo hrisel zawk nan nitin darkar chanve tal taksa sawizawi thin turin kal khawmte hi an intiam a ni.
Infiamna chi hrang hrang, mini marathon leh indigenous games tel in hun hman chhun zawm nghal a ni a. Sports & Youth Services office hrang hrang a thawkte - Secretariat, Directorate leh MSSC, KISCE, NCC, NSS , SAI te leh athletes ten hun ni lengin an hmang ho.
Kharna inkhawm hi Pu H.Lalhmingthanga, Director, Sports & Youth Services khuallian niin infiamna chi hrang hrang lawmman hi khuallian hian a sem nghal a ni.
He hunah hian sports leh community service activities te School Education Department hnuaia School hrang hrangah te, College hrang hrangah te, NCC te , NSS te, District hrang hranga Sports & Youth office-ahte, Khelo India Centre (KIC) District hrang hrangah te hman a ni bawk.
https://dipr.mizoram.gov.in/post/national-sports-day-2024-hman-a-ni
