Dt. 14 January 2025: India ram Sorkar laipuiin Vision 2047 tihlawhtling tura programme a siam pakhat, Viksit Bharat Young Leaders Dialogue, National Youth Festival 2025 chu hlawhtling taka zawh fel a ni ta a. He Festival-a Mizoram aiawh a kalte chu Sports & Youths Services Minister Pu Lalnghinglova Hmar chuan vawiin chawhnu dar 3:00 khan Directorate of Sports &Youth Services Video Conference Hall-ah a kawmna hun a hmang.
Inkawmhona hun hi Pu H. Lalhmingthanga, Director, Sports & Youth Services chuan kaihruaiin, report hrang hrang ngaihthlak a ni a. Zirlaite fuihna hun hman niin, Pu Lalramsanga Sailo IRS Secretary, Sports &Youth Services chuan lawmthu sawina neiin hun hi a khar a ni.
Inkawm honaah hian Higher &Technical Education hotute leh Sports, &Youth Services hotute an tel kim hle a ni.
Viksit Bharat Young Leaders Dialogue, National Youth Festival 2025 bul tanna atan hian MYBharat Portal-ah inziak lûtin thalai mi nuai 30 chuangte chuan November-2024 khan Online-in Quiz an chhang a. Heta titha zual thlan mi nuai 3 te chu thupui hrang hrang 10 atanga an duh ber hmangin essay ziahtir leh an ni a. Essay endik hna hi a ziaktute State/UT-a Sports & Youth Services Department kutah dah a ni.
Mizoram bikah chuan Sports&Youth Services Department leh Higher & Technical Department-te thawk hoin,, H&TE Dept-a expert ten Mizoram atanga essay lutte an en dik a. Thupui tina, essay ziak thate chuan December 23, 2024 khan Power Point Presentation, hmangin intihsiakna (State Championship) an nei leh a. He intihsiaknaa tel zawng zawngte hi Ministry of Youth Affairs &Sports, Govt of India tirh Third Party Moderator-chuan personality assessment a neihpui leh vek hnuah, Power Point Presentation leh Personality Assessment lâk kawpa tithate chu National Level Competition-a tel tura thlan an ni ta a ni.
Mizoram atangin mi 12 thlan chhuah an ni a. Heng thalai rual thlan chhuahte hian January 10-12 2025 chhûnga Viksit Bharat Youth Festival 2025, New Delhi-a neih zawh takah khan, Power Point Presentation hmangin, ram inrelbawlna leh hmasawnna atâna an ngaihdan leh hriat thilte sawi chhuahna hun an nei a.Heng presentation a ti, tha mipa pakhat leh hmeichhia pakhat theuh chu thupui tin atang hian thlan chhuah leh niin, chungte chuan Prime Minister Narendra Modi hma ah ram hmasawnna tur an veizawng te, an thupui theuh hmangin an present leh a ni.
Viksit Bharat Challenge a tel a presentation nei tur hian India ram pum atangin mi 3000 thlan chhuah an ni a. Mizoram atangin mi 12 leh Official Escort 2, Dr H. Lalzuithangi Associate Professor, Govt. Hrangbana College leh Dr. Rosaline Varsangzuali, Associate Professor, Govt Hrangbana College te chu an kal a ni.
Mizoram team atangin Grace Lalrinpari Hauzel leh Yerrabelli Dedeepiya, Reddy te chu Shortlist zingah telin, a tawpah erawh Grace Lalrinpari Hauzel, chauh hian Prime Minister hmaah presentation pêk theihna remchang a nei ta a ni.
Final presenter-te hi January 12, 2025 khan Prime Minister chuan Chawchhun a ei pui a ni.
Viksit Bharat Youth Festival-a kal te hian January 13, 2025 khan tluang takin Aizawl an lo thleng leh a ni.
