Khawzawl : 8.11.2021
NSS Units, Govt. Khawzawl College te chuan ni 2 ata atanga ni 8.11.2021 chhung hian Special Camping neiin Chhanchhuahna Home, Zuchhip Hmunhlui ah Chawlhna Nuam (waiting shed) an sa a. A kharna hun nimin khan hman a ni.
He hun hi Upa Vanlaltluanga, Zuchhip Hmunhlui Committee in a kaihruai a. Pu K. Ziona, Programme Officer, NSS, Govt. Khawzawl College chuan waiting shed sak chu a hawng a ni.
Pu K. Ziona chuan NSS, Govt. Khawzawl College in hma a lo lak tawh thin dan te leh hmachhawp te a sawi a. Chhanchhuahna Home Committee te leh thawktu zawng zawngte chu a fak a, hmasawn zel turin duhsakna a hlan bawk.
He hunah hian Pu Joseph Vanlalnghaka, Asst. Professor, Govt. Khawzawl College pawhin thu sawiin, Ramngaw humhalh a tulzia te leh tuihna humhalh a pawimawh zia te a sawi. Ramngaw humhalh dan tur te a sawi a, kalkhawm zawng zawng te chu mahni hmazawn ah theuh theihtawp chhuah a, tan la turin a sawm bawk.
He hunah hian Pu Lalruatpuia, Secretary, Chhanchhuahna Home Committee leh Pu Rengkunga Renthlei, Zuchhip Hmunhlui Committee ten report an pe a, zaithiam tak tak te zai ngaihthlak a ni bawk.
