Ni 29th August 2019 khan Mizoram History a thil chhinchhiah tlak leh la awm ngai lo ni turin C. Lalremsangan Dhyan Chand Award a chu India President Kovind hnen atangin a dawng.
Mizo thal kah thiam C. Lalremsanga chu kuminah Dhyan Chand Award dawng. 2019 chhunga Dhyan Chand Award dawng tur hian Selection Committee chuan mi chi hrang hrang an ngaihtuah a, infiammi zingah chuan mi panga an thlang chhuak a, heng zingah hian C. Lalremsanga chu a tel ve a ni.
Kumina infiammi zinga Dhyan Chand Award dawng tura an thlan chhuahte hi C. Lalremsanga (Archery), Manuel Fredricks (Hockey), Arup Basak (Table Tennis), Manoj Kumar (Wrestling) leh Nitten Kirrtane (Tennis) te an ni.
Dhyan Chand Award
Dhyan Chand Award for Lifetime Achievement in Sports and Games tih a ni a, a awlsam zawngin Dhyan Chand Award tia sawi a ni a. India ram chhunga infiammite’n an vanglaia hnuhma tha tak an hnutchhiahte chu thamraltir mai loin, ram tana an thil lo tih tawhte chu an hriatpui a ni tih lantirna atan he chawimawina hi an hlan thin a ni.
Chawimawina hi India hockey player ropui, 1926 leh 1948 inkarah India tana goal 1000 chuang thun thei, Dhyan Chand (1905-1979) hming chawia phuah niin, kum tin Ministry of Youth Affairs and Sports chuan infiammite hnenah an hlan thin a ni.
Ministry of Youth Affairs and Sports hian 2016 atang khan chawimawina dawngtute hi hun mawi, certificate, thawmhnaw leh pawisa fai, Rs. 5 lakh an pe thin a. 2009 atang khan pawisa an pek zat hi Rs. 3 lakh atangin Rs. 5 lakh ah hian an tisang tan chiah a ni.
2002 atang khan he chawimawina hi Olympic Games, Paralympic Games, Asian Games, Commonwealth Games, World Championship leh World Cup vela tel chin leh cricket, indigenous games leh parasports lama tel chinte hnenah an hlan tan a. Chawimawina dawng thei tura hming thehluh hun hi April 30 thleng an hawng thin a. Hming lutte hi member 9 awmna committee chuan an lo thlirho a, a hnuah an thlit fim tawhte chu Union Minister of Youth Affairs and Sports lo pawm atan an theh lut ve leh thin a ni.
He chawimawina dawng hmasa berte chu Shahuraj Birajdar (Boxing), Ashok Diwan (Hockey) leh Aparna Ghosh (Basketball) te an ni a, anni hi 2002 khan chawimawina hi an hlan a ni.
Kum khatah hian infiammi pathum aia tam lo hnenah Dhyan Chand Award hi an hlan thin a, 2003, 2012 leh 2013 ah te khan mi pathum aia tam hnenah an hlan a. Nikumah khan Bhupender Singh (Athletics), Syed Shahid Hakim (Football) leh Sumrai Tete (Hockey) te hnenah an hlan a ni.
C. Lalremsanga chu
C. Lalremsanga hian a vanglaiin National level-ah medal eng emaw zat a lak bakah India aiawhin vawi tam tak thal kapin a lo feh chhuak tawh a. 1992 Barcelona Olympic-ah leh 1996 Atlanta Olympic-ah te khan India tan a feh chhuak a, Mizoram chhul chhuak Zofate zinga Olympian kan neih hmasak ber leh tum 2 lai Olympic-a tel thei kan neih awm chhun a ni.
East Lungdar khuaa piang C. Lalremsanga hian TATA Archery Academy-ah kum li dawn a inzir chho a. April 2009-ah khan Santo Domingo-a World Cup stage 1 ah gold 1 leh bronze 2 a la a. May thlaah Porec, Croatia-ah World Cup stage 2 ah gold 2 a la bawk.
Hemi hnuah hian khawvel huapa inelna hrang hrangah a tel chho zel a, medal chi hrang hrang a la zui teuh a. 2010 leh 2011 thleng khan India ram aiawhin vawi duai lo a feh chhuak a, hengah hian medal a la thei deuh zel a, hlawhtlin loh hi chu a nei tlem hle.
1994 atanga 2001 chhung khan India No. 1 a ni char char thei a, mahni invawng fel tak, inthunun thei em em mai a ni a. TATA Sports Academy, Jamshedpur-ah coach-cum-player in hun rei tak chu a khawsa a ni.
TATA Sports Academy-ah hian September 1995 atangin April 2004 thleng a thawk a, Mizoram sorkar chuan April 23, 2004 ah khan Sports Department ah Coach Grade-I hna an pe a ni.
A hnuhma thenkhat
National Level: Junior: 1991 Calcutta ah (50m,30m-Team) ah Gold Medal.
Senior Level: 1994 Gurgoan (70m), 1995 Cuttak (70m-Team leh Individual) Gold Medal.
1997 Delhi (Team, Individual) Gold Medal, 1999 Shillong (50m- Team) Gold medal,
2000 Amravaati (Team), Gold Medal
2001 Kolkata (Team), Gold Medal
2002 Hyderabad (Team) Gold Medal
1994 Naational Games Pune (70m) Gold medal.
Silver Medal:
Junior:1991 Calcutta (Individual)
Senior:1992 Jamshedpur (Team)
1994 Patiala (30m Team)
1995 Cuttak (90m, 30m)
1996 Jamshedpur (30m)
1997 Delhi (90m,70m,50m,30m)
1999 Shillong (30m)
1999 National Games,Manipur(50m-Team)
Bronze MEdal Senior:
1991 Calcutta (Individual)
1994 Gurgoan (90m, 50m-Team, Individual)
1999 National Games, Manipur. (Individual)
International Gold:
1993 International Archery, Bangkok, Thailand (Team)
1993 3rd Federation Cup, Calcutta (Team)
1995 1st Common wealth Archery, Delhi (Team)
Silver Medal Senior:
1992 International Archery (Asia) Championship, Beijing, China (Team)
1995 4th Federation Cup (Delhi, Team, Individual)
1998 1st Asian Archery Circuit Meet, Bangkok, Team, Individual)
1998 2nd Asian Archery Circuit Meet, Singapore (Team, Individual)
1999 1st Asian Cup Archery, Bangkok (Team)
2000 Asian Archery Championship Delhi (Team)
Bronze Medal:
1991 :2nd Federation Cup, International Archery, KAolkata (Team)
1995 : 1st Commonwealth Archery. Delhi (Individual)
1997 : 10th Asian Archery Championship, Malaysia
